"أنا وأنتَ" هبه عارف تكتب: عايزة ورد يا إبراهيم

كل البنات بتحب الرومانسية وكل واحدة بتشوفها بطريقة مختلفة غير التانية ، وكتير بتفهمها زى ماشافتها فى الأفلام " ورد وكلام حلو وخروجات " كل ده بتعيشه فى الخطوبة وبتتخيل إن الحياة هتبقى كده على طول وإنها هتصحى على الورد ومش بعيد تسرح بخيالها إن جوزها هيجبلها الفطار فى السرير كمان زى مسلسل " أبو العروسة ".

لكن مفهوم الرومانسية بيختلف عند الرجاله ،  فقصة الفطار فى السرير والورد ده ممكن يحصل فى أول الجواز وكمان ممكن لغاية أول حَمل ده لو أنتى محظوظة وجوزك كان عنده نوع الرومانسية دى ، بس حتى لو هو كده مش هيكمل .. أنا مش بحبطك بالعكس أنا بحافظ عليكى من الصدمة ، لأنه ببساطة " بنزينه هيخلص " بعد أول طفل وكل ده هيبقى ذكرى حلوة تعيشى عليها العشرين سنة اللى جايين فى حياتكوا .

وعندنا نوع تانى من الرجاله بيلاقى الرومانسية فى صينية مسقعه وطاجن بامية باللحمة الضانى وياسلام لو يبقى الحلو "أم على" يبقى أنتى كده الزوجة المثالية فى نظره ، ودى رومانسية " قلب جوزك فى معدته " وأنا بعتبر ده أطيب نوع فى الرجاله لأن ممكن تكسبى رضاه بسهولة بس المهم تكونى مُتابعة جيدة لبرامج الطبخ وكل الشيفات عشان تجددى الرومانسية بينكم .

واللى هتجوز النوع ده تنسى موضوع الورد عشان ده يوم ما هيحتفل معاكى بأى مناسبة هيدخل عليكى بصينية بسبوسة ولا كباب وكفتة وكنافة وهكذا .....

وكمان عندنا النوع اللى بيحب الست تكون دايماً " على سِنجة عشرة " مهما كان عليها ضغوط مالوش دعوة بحاجة ، المهم يرجع يلاقى كل حاجة مزبوطة ومراته مجهزة العشا وعامله جو رومانسى وكمان العيال نايمين عشان الدوشة ، بس ياترى الست عملت إيه عشان تحضر كل ده وإيه المعاناة اللى عاشتها فى يومها مع الولاد ومسئوليتهم ، كل ده مش مهم عنده ، يعنى اللى هتجوز النوع ده تبقى اجوزت " سى السيد " ولازم تكون هى " أمينة " وتقول آمين على أى حاجه يطلبها عشان هى دى الرومانسية من وجهة نظره .

فكل راجل له مفهوم معين عن الرومانسية غير باقى الرجالة ، زى برضه كل ست لها مفهوم خاص بيها غير باقى الستات ، يعنى فى الأخر مش هنتفق على مفهوم واحد للرومانسية احنا الاتنين أنا وأنتَ . 

وفى الأخر عايزة انصح البنات اليومين دول بلاش فُرجة كتير على المسلسلات التركى ، عشان الرومانسية اللى فيها مش هتقبليها فى الواقع فبلاش تعشمى نفسك بزيادة ، عشان أنتى لو وصلتى لرومانسية الورد ده هيبقى أكبر إنجاز .