"أنا وأنت" هبة عارف تكتب..عايزنى "نانسي"..خليك"عز"

كل ست بتحب يبقى شكلها حلو، وتجدد من "اللوك بتاعها" كل شوية، بس ده بيبقى بمزاجها وبحريتها، لكن لما جوزها يطلب منها ده هنا الموضوع بيختلف وبيبقى عبء على الزوجة وبتحس إنها مش عاجبه جوزها وثقتها فى نفسها بتتهز، وهنا الزوجة عشان ترضى جوزها، بتعمل أى حاجه عشان تبقى حلوة فى عنيه وترجع ثقتها فى نفسها، وده بيخليها صيدة حلوة للبيوتى سنتر وخلافه.

وبيزيد الموضوع سوء لما الزوج يطلب منها تروح لدكاترة التجميل عشان ترضى غروره ويشوفها زى الفنانات اللى بيشوفهم فى التلفزيون وبيُعجب بشكلهم، ومايعرفش إيه الروح اللى ورا الشكل الحلو ده.

وللأسف فى زوجات بتخضع وتوافق على المهزلة دى، وهنا عايزة أقول لكل زوجة بتوافق على ده، أنتى مهما عملتى عمليات وغيرتى من شكلك مش هترضى جوزك، لأن النوع اللى بياخده غروره وأنانيته ويطلب من مراته الطلب ده بيبقى "مريض" وكان نفسه يعيش فى عصر الحريم ويبقى عنده أشكال وألوان من الحريم، وأوعى يضحك عليكى ويقولك أنه بيحبك، لأن اللى بيحب بيخاف على حبيبه ويخاف يجرحه بكلمة مش يبقى السبب بجرحه بمشرط جراح التجميل المزيف.

وفى النهاية أحب أوجه سؤال لهذا الزوج لو مراتك هى اللى طلبت منك تعمل عملية تجميل ... هتوافق وترضيها؟؟؟؟؟؟؟؟؟؟؟؟   ماهو لو أنت عايزنى " نانسى"، أنا كمان عايزاك "عز" .